ກອງປະຊຸມວິທະຍາສາດ ພາໃຕ້ຫົວຂໍ້ “ຢຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ”

altໃນວັນທີ 26 ພະຈິກ ທີ່ຜ່ານ ຄະນະກຳມາທິການເພື່ອຄວາມກ້າວຫນ້າຂອງແມ່ຍິງແຫ່ງຊາດ ໄດ້ຈັດກອງປະຊຸມສຳມະນາວິທະຍາສາດ ໃນຫົວຂໍ້ “ຢຸດຕິຄວາມຮຸນແຮງຕໍ່ແມ່ຍິງ ແລະ ເດັກຂຶ້ນ ໂດຍການເປັນປະທານຂອງທ່ານນາງເຂັມແພງ ພົນເສນາ ລັດຖະມົນຕີປະຈໍາຫ້ອງວ່າການລັດຖະບານ, ປະທານຄະນະກຳມາທິການເພື່ອຄວາມກ້າວຫນ້າຂອງແມ່ຍິງແຫ່ງຊາດ. ເຂົ້າຮ່ວມກອງປະຊຸມດັ່ງກ່າວມີທ່ານນາງ ລິນດາ ວໍໄທສົງ ເອອັກຄະລັດຖະທູດອົດສະຕາລີ ປະຈໍາ ສປປ ລາວ, ບັນດາທ່ານລັດຖະມົນຕີຊ່ວຍວ່າການ, ຮອງຫົວຫນ້າອົງການທີ່ເປັນປະທານຄະນະກຳມາທິການ (ຄກມ) ບັນດາກະຊວງ ແລະ ອົງການພ້ອມດ້ວຍຫົວຫນ້າຫ້ອງການ, ຫົວຫນ້າພະແນກ, ຮອງຫົວຫນ້າພະແນກ ຄກມ ກະຊວງອົງການ, ຕາງຫນ້າອົງການຈັດມູນນິທິເອເຊຍ, ສະມາຄົມພັດທະນາບົດບາດຍິງຊາຍ ແລະ ພະນັກງານກອງເລຂາ ຄກມຊ ລວມທັງຫມົດ 84 ທ່ານ ຊາຍ 22 ທ່ານ

ກອງປະຊຸມຄັ້ງນີ້ ເປັນການສະເຫລີມສະຫລອງວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກ ວັນທີ 25 ພະຈິກ ທີ່ຊາວໂລກໃຫ້ຄວາມສຳຄັນເພື່ອລະນຶກເຖິງການຕໍ່ສູ້ເພື່ອຕໍ່ຕ້ານການຕົກເປັນເຫຍື່ອຂອງຄວາມຮຸນແຮງຕໍ່ແມ່ຍິງ ຂອງສາມເອື້ອຍນ້ອງ ຕະກູນນິຣາບານ ທີ່ສາທາລະນະລັດ ໂດມີນີແກນທີ່ຖືກລອບສັງຫານໂດຍລະບອບຜະເດັດການທຣູກີໂລ ແລະ ລະນຶກເຖິງການສັງຫານຫມູ່ນັກສຶກສາວິສະວະກຳຍິງ 14 ຄົນ ທີ່ນະຄອນຫລວງ ມົງເຕອານ ປະເທດການາດາ ຍ້ອນການເຄື່ອນໄຫວສະຫນັບສະຫນູນສິດທິຂອງແມ່ຍິງ. ຊຶ່ງຂະບວນການເຄື່ອນໄຫວ 16 ວັນເພື່ອຢຸດຕິຄວາມຮຸນແຮງຕໍ່ແມ່ຍິງ ໂດຍເລີ່ມແຕ່ວັນທີ 25 ພະຈິກ ເຖິງວັນທີ 10 ທັນວາ  ເຊິ່ງໄລຍະດັ່ງກ່າວ ກວມເອົາ 4 ວັນສຳຄັນດັ່ງນີ້: ວັນທີ 25 ພະຈິກ ເປັນວັນສາກົນຕ້ານການໃຊ້ຄວາມຮຸນແຮງຕໍ່ແມ່ຍິງ, ວັນທີ 1 ທັນວາ ເປັນວັນຕ້ານເອດສ໌ໃນທົ່ວໂລກ, ວັນທີ 6 ທັນວາ ເປັນວັນຄົບຮອບການສັງຫານໝູ່ນັກສຶກສາວິສະວະກຳຍິງ 14 ຄົນ ຢູ່ນະຄອນຫລວງ ມົງເຕອານ.

ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງສານຂອງທ່ານນາຍົກລັດຖະມົນຕໍ່ກ່າວເນື່ອງໃນໂອກາດວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ປະຫວັດຄວາມເປັນມາຂອງການປະກາດເອົາວັນທີ 25 ພະຈິກ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ໃນສປປ ລາວ,ຊົມວີດີໂອສາລະຄະດີ ຄວາມຮຸນແຮງໃນຄອບຄົວ ພ້ອມກັນນັ້ນຜູ້ເຂົ້າຮ່ວມກອງປະຊຸມຍັງໄດ້ຮັບຟັງການລາຍງານຜົນການຈັດຕັ້ງປິຕິບັດວຽກງານຕ້ານຄວາມຮຸນແຮງຕໍ່ແມ່ຍິງ ແລະ ເດັກນ້ອຍຈາກພາກສ່ວນຕ່າງໆ ໃນໄລຍະຜ່ານ, ຊຶ່ງເຮັດໃຫ້ຜູ້ເຂົ້າຮ່ວມມືຄວາມຮັບເຂົ້າໃຈຫລາຍຂຶ້ນກ່ຽວກັບບັນຫາຄວາມຮຸນແຮງຕໍແມ່ຍິງ ແລະ ເດັກນ້ອຍ ເປັນສິ່ງທີ່ຮັບບໍ່ໄດ້ ແລະ ເປັນການລະເມີດສິດທິຂອງແມ່ຍິງ ກໍຄືສິດທິຂັ້ນພື້ນຖານຂອງມະນຸດ. ໃນວ່າລະກອງປະຊຸມ ທ່ານປະທານ ຄກມຊ ໄດ້ຮຽກຮ້ອງໃຫ້ທຸກກະຊວງ ອົງການ ແລະ ທຸກພາກສ່ວນໃນທ່ວສັງຄົມ ຮ່ວມມືກັນໃນການ້ປອງກັນ ແລະ ລຶບລ້າງທຸກຮູບການຂອງຄວາມຮຸນແຮງໃນຄອບຄົວ ແລະ ສັງຄົມໃຫ້ຫມົດໄປ ເພື່ອເຮັດໃຫ້ສັງຄົມລາວກາຍເປັນສັງຄົມທີ່ມີແຕ່ຄວາມສະເຫມີພາບຍິງ-ຊາຍ ທີ່ປາສະຈາກການໃຊ້ຄວາມຮຸນແຮງ ເວົ້າສະເພາະເພື່ອຮັບປະກັນໃຫ້ແມ່ຍິງ ແລະ ເດັກນ້ອຍໄດ້ດຳລົງຊີວິດໃນສັງຄົມປອດໄພຈາກການໃຊ້ຄວາມຮຸນແຮງ.

 (ປ່ຽນແທນຂ່າວທີ່ອອກຄັ້ງວັນທີ ທັນວາ ຢູ່ຫນ້າ 2 ໃນຫົວຂໍ້ກອງປະຊຸມວິທະຍາ ຫົວຂໍ້ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ຈັດໂດຍກະຊວງພາຍໃນ ນັ້ນ ແມ່ນຜິດ)