ກອງປະຊຸມຄົບຄະນະເປີດກວ້າງຂອງ ຄກມຊ ປະຈໍາສົກປີ 2014-2015

altກອງປະຊຸມຄົບຄະນະເປີດກວ້າງຂອງຄະນະກຳມາທິການ ເພື່ອຄວາມກ້າວໜ້າຂອງແມ່ຍິງແຫ່ງຊາດ ປະຈຳສົກປີ 2014 - 2015 ໄດ້ຈັດຂຶ້ນໃນ ວັນທີ 17 ຕຸລາ 2014 ທີ່ ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມ ເປັນປະທານຂອງ ທ່ານ ອາຊາງ ລາວລີ ຮອງນາຍົກລັດຖະມົນຕີ ຜູ້ຊີ້ນຳຂົງເຂດການປົກຄອງ ແລະ ຜູ້ຊີ້ນຳຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ,

ມີບັນດາທ່ານລັດຖະມົນຕີຊ່ວຍ, ຮອງຫົວໜ້າອົງການທີ່ເປັນຮອງປະທານ ແລະ ຄະນະໃນກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ ແລະ ເປັນປະທານ ຄກມ ກະຊວງ, ອົງການ; ທ່ານຮອງເຂົ້າແຂວງ, ຮອງຫົວໜ້າກົມ ແລະ ຮອງຫົວໜ້າພະແນກຄວາມກ້າວແມ່ຍິງ ແລະ ວຽກແມ່ ແລະ ເດັກ ກະຊວງ, ອົງການ, ແຂວງ ແລະ ນະຄອນຫຼວງເຂົ້າຮ່ວມທັງໝົດ 127 ທ່ານ, ເປັນຍິງ 77 ທ່ານ ແລະ ຊາຍ 50 ທ່ານ.

ກອງປະຊຸມໄດ້ຜ່ານຮ່າງບົດສະຫຼຸບການຈັດຕັ້ງປະຕິບັດມະຕິຂອງກອງປະຊຸມຄົບຄະນະເປີດກວ້າງຄະນະກຳມາທິການ ເພື່ອຄວາມ ກ້າວໜ້າຂອງແມ່ຍິງແຫ່ງຊາດສົກປີ 2013-2014 ແລະ ຮ່າງທິດທາງແຜນການເຄື່ອນໄຫວສົກປີ 2014 – 2015; ບົດລາຍງານການຈັດຕັ້ງປະຕິບັດການສ້າງຄອບຄົວ, ບ້ານ ແລະ ເມືອງພັດທະນາທີ່ຕິດພັນກັບການປະຕິບັດສິດສະເໝີພາບຍິງ-ຊາຍ ທີ່ປາສະກຄວາມຮຸນແຮງໃນຄອບຄົວ ໂດຍສະເພາະຕໍ່ແມ່ຍິງ ແລະ ເດັກ, ຮ່າງແຜນຍຸດທະສາດແຫ່ງຊາດເພື່ອສົ່ງເສີມຄວາມກ້າວໜ້າຂອງແມ່ຍິງ 5 ປີ ຄັ້ງທີ III (2016 - 2020), ຮ່າງບົດລາຍງານແຫ່ງຊາດປະຈຳໄລຍະທີ 8 ແລະ ທີ 9 ກ່ຽວກັນຈັດຕັ້ງປະຕິບັດສົນທິສັນຍາ ຊີດໍ ໃນ ສປປ ລາວ. ນອກຈາກນີ້ກອງປະຊຸມ ຜູ້ແທນທີ່ເຂົ້າຮ່ວມກອງປະຊຸມຍັງໄດ້ຮັບຟັງການໂອ້ລົມຂອງທ່ານຮອງນາຍົກລັດຖະມົນຕີ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ 1 ປີ ທີ່ ຄກມຊ ສາມາດປະຕິບັດໄດ້ ແລະ ເພື່ອສືບຕໍ່ເຮັດໃຫ້ການເຄື່ອນໄຫວວຽກງານໃນປີຕໍ່ໜ້າໄດ້ຮັບຜົນສຳເລັດໃໝ່ທີ່ໃຫຍ່ກວ່າເກົ່າ ທ່ານໄດ້ຮຽກຮ້ອງ ແລະ ເນັ້ນໜັກບາງບັນຫາສຳຄັນຄື: 1. ເອົາໃຈໃສ່ການເຊື່ອມຊຶມ ແລະ ຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ IX ຂອງພັກ, ທິດທາງ ແລະ ຄາດໝາຍໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 7 ທີ່ກ່ຽວພັນເຖິງການສົ່ງເສີມຄວາມສະເໝີພາບຍິງ-ຊາຍ ລວມທັງເນື້ອໃນຂອງແຜນຍຸດທະສາດແຫ່ງຊາດ ເພື່ອສົ່ງເສີມຄວາມກ້າວໜ້າຂອງແມ່ຍິງແຫ່ງຊາດໃຫ້ລະອຽດ, 2. ສືບຕໍ່ປັບປຸງກົງຈັກເສນາທິການຂອງຄະນະກຳມາທິການເພື່ອຄວາມກ້າວໜ້າຂອງແມ່ຍິງຢູ່ຂັ້ນສູນກາງ ແລະ ທ້ອງຖິ່ນເປັນຕົ້ນ ຄວາມຮູ້ຄວາມສາມາດດ້ານວິຊາການ ແລະ ປະສົບການຕົວຈິງໃນການເຮັດວຽກງານສົ່ງເສີມຄວາມກ້າວ ໜ້າຂອງແມ່ຍິງ, ໂຄສະນາເຜີຍແຜ່ ແລະ ແນະນຳການຈັດຕັ້ງປະຕິບັດແຜນດຳເນີນງານແຫ່ງຊາດກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກໃນ ສປປ ລາວ (2014 - 2020) ໃຫ້ກວ້າງໃນຂອບເຂດທົ່ວປະເທດ, 3. ເພີ່ມທະວີຄວາມຮັບຜິດຊອບຂອງຕົນໃນການປະຕິບັດໜ້າທີ່ເປັນເສນາທິການໃຫ້ແກ່ການນຳແຕ່ລະຂັ້ນ ແລະ ສືບຕໍ່ເອົາໃຈໃສ່ປັບປຸງກົງຈັກຂອງຕົນໃຫ້ມີຄວາມເຂັ້ມແຂງຮອບດ້ານ, 4. ສືບຕໍ່ເອົາໃຈໃສ່ໂຄສະນາເຜີຍແຜ່ ແລະ ປູກຈິດສຳນຶກໃນການຈັດຕັ້ງຂອງພັກ - ລັດທຸກຂັ້ນ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ ແລະ ທຸກພາກສ່ວນໃນສັງຄົມໃຫ້ເຫັນໄດ້ຄວາມສຳຄັນຂອງວຽກງານດັ່ງກ່າວ, 5. ສືບຕໍ່ນຳເອົາວຽກຄວາມກ້າວໜ້າຂອງແມ່ຍິງ, ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຫັນລົງຮາກຖານໂດຍຕິດພັນກັບຂະບວນການ 3 ສ້າງ, ເອົາໃຈໃສ່ເກັບກຳສະພາບຄວາມເປັນຈິງກ່ຽວກັບຂໍ້ຫຍຸ້ງຍາກ ແລະ ສິ່ງກີດ ຂວາງຄວາມກ້າວໜ້າຂອງແມ່ຍິງ, 6. ສືບຕໍ່ປັບປຸງກົນໄກການຕິດຕາມກວດກາ ສະຫຼຸຸບລາຍງານວຽກງານຄວາມກ້າວໜ້າຂອງແມ່ຍິງ ໃນນັ້ນໃຫ້ເອົາໃຈໃສ່ຫັນເປັນແຜນການ, ແຜນງົບປະມານທີ່ເຊື່ອມຈອດກັບລະບົບແຜນການ ແລະ ງົບປະມານຂອງຂະແໜງການ ແລະ ທ້ອງຖິ່ນ ແຕ່ລະຂັ້ນໂດຍຫັນເປັນແຜນວຽກ, ແຜນຄົນ, ແຜນເງິນຢ່າງເປັນລະ ບົບ, 7. ສືບຕໍ່ຮ່ວມມືກັບຕ່າງປະເທດ, ອົງການຈັດຕັ້ງ ສາກົນ ແລະ ອົງການຈັດຕັ້ງຕ່າງໆ ໃນສັງຄົມ ລວມທັງບັນ ດາປະເທດໃນອາຊຽນທີ່ຕິດພັນກັບວຽກງານຄວາມກ້າວໜ້າຂອງແມ່ຍິງ, 8. ເອົາໃຈໃສ່ປັບປຸງແຜນວິທີນຳພາຂອງຄະ ນະກຳມາທິການສົ່ງເສີມຄວາມກ້າວໜ້າຂອງແມ່ຍິງທຸກຂັ້ນ, ປະຕິບັດຫຼັກການນຳພາເປັນໝູ່ຄະນະ, ຮັກສາລະບອບສ່ອງແສງລາຍງານຂໍຄຳເຫັນຈາກຂັ້ນເທິງເປັນປົກກະຕິ ແລະ ທັນເວລາ.