ຈັດສຳມະນາ ແລະ ວາງສະແດງຮູບພາບ ລະນຶກວັນສາກົນຢຸດຕິຄວາມຮຸນແຮງຕໍ່ແມ່ຍິງ ວັນທີ 25 ພະຈິກ.

altເນື່ອງໃນໂອກາດວັນສາກົນຢຸດຕິຄວາມຮຸນແຮງຕໍ່ແມ່ຍິງ ວັນທີ 25 ພະຈິກ ໄດ້ໝູນວຽນມາຄົບຮອບອີກວາລະໜຶ່ງ ຄະນະກຳມາທິການຄວາມເພື່ອກ້າວໜ້າແມ່ຍິງແຫ່ງຊາດໄດ້ຈັດສຳມະນາແລະວາງ ສະແດງຜົນງານການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງຂຶ້ນ ໃນວັນທີ 15 ທັນວາ 2014 ຢູ່ທີ່ສູນການຄ້າລາວ-ໄອເຕັກ

 

 

altໂດຍການເປັນປະທານຂອງທ່ານນາງບັນດິດປະທຸມວັນ ຮັກສາການປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ, ຮອງປະທານສູນກາງສະຫະພັນແມ່ຍິງລາວ. ໃຫ້ກຽດເຂົ້າຮ່ວມງານສຳມະນາໃນຄັ້ງນີ້ ມີບັນດາທ່ານປະທານ ຄກມ ກະຊວງ, ອົງການ, ຄກມ ນະຄອນຫຼວງວຽງຈັນ, ຜູ້ຕາງໜ້າອົງການຈັດຕັ້ງສາກົນ, ບັນດາທູຕານຸທູດ, ຄູອາຈານ ແລະ ນັກຮຽນພ້ອມດ້ວຍອົງການຈັດຕັ້ງມະຫາຊົນເຂົ້າຮ່ວມເປັນຈຳນວນ400 ກວ່າຄົນ.

ການສຳມະນາ ແລະ ວາງສະແດງຜົນງານການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກໃນຄັ້ງນີ້ ເພື່ອໂຄສະນາເຜີຍແຜ່ ແລະ ປູກຈິດສຳນຶກໃຫ້ມວນຊົນ, ຄູ-ອາຈານ ແລະ ນັກຮຽນນັກສຶກສາໄດ້ຮັບຮູ້ ແລະ ເຂົ້າໃຈວ່າການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງເປັນລ່ວງລະເມີດສິດທິມະນຸດຂັ້ນພື້ນຖານຂອງແມ່ຍິງ ອັນເກີດຈາກຄວາມບໍ່ສົມດູນກັນທາງດ້ານອຳນາດລະຫວ່າງຍິງ-ຊາຍ ແລະ ການຈຳແນກຕໍ່ແມ່ຍິງ ທີ່ສົ່ງຜົນກະທົບຕໍ່ຮ່າງກາຍ, ຈິດໃຈ,ທາງເພດ ແລະເສດຖະກິດກິດຂອງແມ່ຍິງ ແລະ ເດັກຍິງ ທີ່ເປັນອຖປະສັກກີດຂວາງການພັດທະນາຄວາມກ້າວໜ້າຂອງແມ່ຍິງ ແລະ ເດັກຍິງ.

ໃນວາລະກ່າວເປີດການສຳມະນາ ທ່ານນາງບັນດິດປະທຸມວັນ ໄດ້ກໍໄດ້ເນັ້ນຕື່ມວ່າ: ການຈັດສຳມະນາ ແລະ ວາງສະແດງຮູບພາບໃນຄັ້ງນີ້ ເປັນການໂຄສະນາ ເຜີຍແຜ່ໃຫ້ສັງຄົມຮັບຮູ້, ເຊື່ອມຊຶມ ແລະ ເຂົ້າໃຈຕໍ່ວຽກງານງານສົ່ງເສີມຄວາມສະເໝີພາບຍິງ-ຊາຍ, ສ້າງຄວາມເຂັ້ມແຂງໃຫ້ແກ່ແມ່ຍິງ,  ຕ້ານທຸກຮູບການຈຳແນກ ແລະ ການໃຊ້ຄວາມຮຸນແຮງຕໍ່ແມ່ຍິງ ໂດຍການມີສ່ວນຮ່ວມຂອງຫຼາຍພາກສ່ວນເຂົ້າໃນການໂຄສະນາເຜີຍແຜ່ແນວທາງນະໂຍບາຍຂອງພັກ,  ກົດໝາຍຂອງລັດ,  ນິຕິກຳ, ແຜນຍຸດທະສາດແຫ່ງຊາດເພື່ອສົ່ງເສີມຄວາມກ້າວໜ້າຂອງແມ່ຍິງ ແລະ ແຜນດຳເນີນງານກ່ຽວກັບກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ໃຫ້ທົ່ວເຖິງໃນທົ່ວສັງຄົມ.  ໃນການສຳມະນາ ແລະ ວາງສະແດງຜົນງານຄັ້ງນີ້ ບັນດາຜູ້ເຂົ້າຮ່ວມໄດ້ຮັບຟັງການນຳລະເໜີເອກະສານສຳຄັນຕ່າງໆ ເປັນຕົ້ນ: ຜົນການສຳຫຼວດການໃຊ້ຄວາມຮຸນແຮງຕໍ່ແມ່ຍິງ, ຜົນໄດ້ຮັບຂອງການເຂົ້າຮ່ວມກອງປະຊຸມປັກກິ່ງບວກ20, ແຜນດຳເນີນງານແຫ່ງຊາດກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ການສົນທະນາກຸ່ມກ່ຽວກັບຫົວຂໍ້ແມ່ຍິງກັບການເຂົ້າເຖິງສຸຂະພາບ, ແມ່ຍິງກັບການເຂົ້າເຖິງກົດໝາຍ ແລະ ການມີສ່ວນຮ່ວມຂອງເພດຊາຍໃນການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ຊຶ່ງບັນດາຜູ້ເຂົ້າຮ່ວມໄດ້ມີໂອກາດສົນທະນາແລກປ່ຽນບົດຮຽນຮ່ວມກັນ ແລະ ເຂົ້າໃຈຫຼາຍຂຶ້ນກ່ຽວກັບບັນຫາຄວາມຮຸນແຮງຕໍ່ແມ່ຍິງ ແລະ ເດັກຍິງ ທີ່ສັງຄົມຈະຕ້ອງພ້ອມກັນແກ້ໄຂເພື່ອປ້ອງກັນບໍ່ໃຫ້ເກີດຄວາມຮຸນແຮງຕໍ່ແມ່ຍິງ ທັງໃນຢູ່ໃນຄອບຄົວ ແລະ ສະຖານທີ່ສາທາລະນະ.

ບັນດາຜູ້ແທນທີ່ເຂົ້າຮ່ວມຍົງໄດ້ຮັບຊົມຫ້ອງວາງສະແດງຜົນງານການເຄື່ອນໄຫວວຽກງານປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງຂອງບັນດາກະຊວງ, ອົງການ ແລະ ການຈັດຕັ້ງສາກົນຕ່າງໆ. ງານສໍາມະນາ ແລະ ວາງສະແດງຮູບພາບໃນຄັ້ງນີ້ ໂດຍໄດ້ຮັບການການສະໜັບສະໜູນຈາກອົງການສະຫະປະຊາຊາດ ເພື່ອການພັດທະນາ.