ກິດຈະກຳສົນທະນາ ໃນຫົວຂໍ້ “ຮ່ວມກັນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ”

altເພື່ອລະນຶກວັນສາກົນຢຸດຕິຄວາມຮຸນແຮງຕໍແມ່ຍິງ ວັນທີ 25 ພະຈິກ, ຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ ຮ່ວມກັບຄະນະວິທະຍາສາດສັງຄົມມະຫາວິທະຍາໄລແຫ່ງຊາດ ຈັດກິດຈະກຳສົນທະນາ ໃນຫົວຂໍ້ “ຮ່ວມກັນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ” ຂຶ້ນໃນວັນທີ 4 ທັນວາ 2014 ທີ່ມະຫາວິທະຍາໄລແຫ່ງຊາດໃຫ້ກຽດເຂົ້າຮ່ວມ ແລະ ເປັນປະທ່ານໂດຍ ທ່ານຮສ.ດຣ. ຄຳມະນີ ສຸລິເດດ ຄະນະບໍດີຄະນະວິທະຍາສາດສັງຄົມມະຫາວິທະຍາໄລແຫ່ງຊາດ ແລະ ທ່ານນາງ ຈັນໂສດາ ພອນທິບ ຫົວໜ້າກອງເລຂາຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ. ມີບັນດາຄູ-ອາຈານ ແລະ ນັກສຶກສາເຂົ້າຮ່ວມຈຳນວນ 300 ກວ່າຄົນ.

 

 

ກິດຈະກຳດັ່ງກ່າວເປັນການໂຄສະນາເຜີຍແຜ່ ແລະ ສ້າງຈິດສຳນຶກໃຫ້ບັນດາຄູ - ອາຈານແລະນັກຮຽນ-ນັກສຶກ ມີຄວາມຮັບຮູ້-ຄວາມເຂົ້າໃຈກ່ຽວກັບບັນຫາທີ່ພາໃຫ້ເກີດຄວາມຮຸນແຮງຕໍ່ແມ່ຍິງທີ່ເປັນການລ່ວງລະເມີດສິດທິມະນຸດຂັ້ນພື້ນຖານຂອງແມ່ຍິງ ແລະ ຮັບຮູ້ວ່າຄວາມຮຸນແຮງເປັນສິ່ງທີ່ສາມາດປ້ອງກັນ ແລະ ແກ້ໄຂໄດ້ ໂດຍການເຂົ້າຮ່ວ່ມ ແລະ ມີສ່ວນຮ່ວມຂອງໝົດທຸກຄົນໃນສັງຄົມ ເພື່ອປ້ອງກັນບໍ່ໃຫ້ເກີດຄວາມຮຸນແຮງຂຶ້ນໃນສັງຄົມ ດ້ວຍການເຄົາລົບນັບຖື ແລະ ໃຫ້ກຽດເຊິງກັນ ແລະ ກັນ ແລະ ບໍ່ມີການຈຳແນກຕໍ່ແມ່ຍິງ.

 ທ່ານນາງ ຈັນໂສດາ ພອນທິບ ຫົວໜ້າກອງເລຂາຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດເນັ້ນຕື່ມວ່າ: ຄວາມຮຸນແຮງຕໍ່ແມ່ຍິງ ແລະ ເດັກຍິງເປັນປະກົດການຫຍໍ້ທໍ້ຂອງອັນຮ້າຍແຮງຂອງສັງຄົມອີກຮູບແບບໜຶ່ງທີ່ເກີດຂຶ້ນກັບແມ່ຍິງທຸກເພດ, ທຸກໄວ, ເຊິ່ງເກີດມາຈາກຫລາຍຄວາມບໍ່ສົມດຸນທາງດ້ານອຳນາດລະຫວ່າງຍິງ-ຊາຍ ແລະ ການຈຳແນກຕໍ່ແມ່ຍິງ ທີ່ມີຕໍ່ແມ່ຍິງໃນສັງຄົມ. ສະນັ້ນເພື່ອປ້ອງກັນບໍ່ໃຫ້ເກີດຄວາມຮຸນແຮງຕໍ່ແມ່ຍິງ ແລະ ເດັກຍິງ ໂດຍສະເພາະຄວາມຮຸນແຮງໃນສະຖາບັນການສຶກສາ ທ່ານນາງຈັນ ໂສດາ ພອນທິບຮຽກຮ້ອງໃຫ້ບັນດາພະນັກງານຄູ-ອາຈານ, ນັກຮຽນນັກສຶກສາພ້ອມກັນສ້າງຂະບວນການ ແລະ ໂຄສະນາເຜີຍແຜ່ແນວທາງນະໂຍບາຍຂອງພັກ-ລັດ, ກົດໝາຍ, ສົນທິສັນຍາຊີດໍ ແລະ ແຜນປະຕິບັດງານສາກົນຕ່າງໆ ທີ່ພົວພັນເຖິງການສົ່ງເສີມຄວາມສະເໝີພາບຍິງ-ຊາຍ, ການລຶບລ້າງທຸກຮູບການຈຳແນກ ແລະ ແຜນດຳເນີນງານກ່ຽວກັບການປ້ອງກັນ ແລະ ລຶບລ້າງຄ ວາມຮຸນແຮງຕໍ່ແມ່ຍິງ ແລະ ເດັກ ໃນ ສປປ ລາວ 2014-2020 ໃຫ້ເປັນຂະບວນກວ້າງຂວາງໃນຂົງເຂດການສຶກສາ.

ກິດຈະກຳການສົນທະນາທີ່ຈັດຂຶ້ນໃນຄັ້ງນີ້ ບັນຄູ-ອາຈານ ແລະ ນັກສຶກສາທີ່ເຂົ້າຮ່ວມໄດ້ຮັບຟັງ ແລະ ຊົມການສະແດງເຕັ້ນ, ລະຄອນສັ້ນ ທີ່ມີເນື້ອໃນສ່ອງແສງກ່ຽວກັບການຕ້ານການໃຊ້ຄວາມຮຸນແຮງ ເຮັດໃຫ້ຜູ້ເຂົ້າຮ່ວມຮັບຮູ້ເຂົ້າໃຈເລິກເຊິງກ່ຽວກັບຄວາມຮຸນແຮງຕໍ່ແມ່ຍິງ ແລະ ເດັກຍິງຫຼາຍຂຶ້ນກວ່າເກົ່າ ແລະ ເພື່ອສ້າງໃຫ້ເຂົາເຈົ້າມີທັດສະນະທີ່ຖືກຕ້ອງຕໍ່ບົດບາດຍິງ-ຊາຍ ແລະ ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງຢູ່ໃນສະຖາບັນການສຶກສາ.