ກອງປະຊຸມຄົບຄະນະ ຄກມຊ ປະຈໍາສົກປີ 2015-2016

ກອງປະຊຸມຄົບຄະນະເປີດກວ້າງຂອງຄະນະກຳມາທິການ ເພື່ອຄວາມກ້າວໜ້າຂອງແມ່ຍິງແຫ່ງຊາດ ປະຈຳສົກປີ 2015 - 2016 ໄດ້ຈັດຂຶ້ນໃນ ວັນທີ 20 ພະຈິກ 2014 ທີ່ ຫ້ອງວ່າການລັດຖະບານ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມ ເປັນປະທານຂອງ ທ່ານ ນາງ ບັນດິດ ປະທຸມວັນ ຮອງປະທານສູນກາງສະຫະພັນແມ່ຍິງລາວ, ຮັກສາການປະທານຄະນະກໍາມາທິເພື່ອຄວາມກ້າວໜ້າຂອງແມ່ຍິງແຫ່ງຊາດ ມີບັນດາຄະນະໃນກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ 29 ທ່ານ ແລະ ກອງເລຂາ ຄກມຊ 10 ທ່ານ ຮ່ວມທັງໝົດ 39 ທ່ານ.

ເພື່ອສະຫຼູບຕີລາຄາຄືນກ່ຽວກັບການຈັດຕັ້ງປະຕິບັດວຽກງານສົ່ງເສີ່ມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບຍິງ-ຊາຍ ປະຈໍາສົກປີ 2014-2015 ແລະ ທິດທາງແຜນການເຄື່ອນໄຫວປະຈໍາສົກປີ 2015-2016 ແລະ ເພື່ອສະຫຼູບຕີລາຄາຄືນກ່ຽວກັບການຈັດຕັ້ງປະຕິບັດແຜນຍຸດທະສາດແຫ່ງຊາດເພື່ອຄວາມສົ່ງເສີມຄວາມກ້າວໜ້າຂອງແມ່ຍິງ ໄລຍະ 10 ປີ (2006-2015) ແລະ ທິດທາງແຜນການຈັດຕັ້ງປະຕິບັດໄລຍະ 10 ປີ (2016-2025) ພ້ອມທັງແຜນດໍາເນີນງານແຫ່ງຊາດເພື່ອຄວາມສະເໝີພາບຍິງ-ຊາຍ 5 ປີຄັ້ງທີ 3 (2016-2020).

ກອງປະຊຸມໄດ້ຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດວຽກງານສົ່ງເສີມຄວາມກ້າວໜ້າຂອງແມ່ຍິງ ແລະ ຄວາມສະເໝີພາບຍິງ-ຊາຍ ປະຈໍາສົກປີ 2014-2015  ແລະ ທິດທາງແຜນການເຄື່ອນໄຫວປະຈໍາສົກປີ 2015-2016; ບົດລາຍງານແຫ່ງຊາດປະຈໍາໄລຍະທີ 8 ແລະ 9 ກ່ຽວກັບຈັດຕັ້ງປະຕິບັດສົນທິສັນຍາຊີດໍ ໃນ ສປປ ລາວ; ຮ່າງວິໄສທັດຮອດປີ 2030 ແລະ ແຜນຍຸດທະສາດເພື່ອຄວາມສະເໝີພາບຍິງ-ຊາຍ ໄລຍະ 10 ປີ (2016-2025); ຮ່າງແຜນພັດທະນາແຫ່ງຊາດ ເພື່ອຄວາມສະເໝີພາບຍິງ-ຊາຍ 5 ປີຄັ້ງທີ 3 (2016-2020). ນອກຈາກນີ້ກອງປະຊຸມ ຜູ້ແທນທີ່ເຂົ້າຮ່ວມກອງປະຊຸມຍັງໄດ້ຮັບຟັງການໂອ້ລົມຂອງທ່ານ ອາຊາງ ລາວລີ ຮອງນາຍົກລັດຖະມົນຕີ ຜູ້ຊີ້ນຳຂົງເຂດການປົກຄອງ ແລະ ຜູ້ຊີ້ນຳຄະນະກຳມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ 1 ປີ ທີ່ ຄກມຊ ສາມາດປະຕິບັດໄດ້ ແລະ ເພື່ອສືບຕໍ່ເຮັດໃຫ້ການເຄື່ອນໄຫວວຽກງານໃນປີຕໍ່ໜ້າໄດ້ຮັບຜົນສຳເລັດອັນໃໝ່ທີ່ໃຫຍ່ກວ່າເກົ່າ ທ່ານໄດ້ຮຽກຮ້ອງ ແລະ ເນັ້ນໜັກບາງບັນຫາສຳຄັນຄື:

1. ເພີ່ມຄວາມເອົາໃຈໃສ່ການເຊື່ອມຊຶມ ແລະ ຜັນຂະຫຍາຍເນື້ອໃນມະຕິກອງປະຊຸມໃຫຍ່ຄັ້ງທີ IX ຂອງພັກ, ທິດທາງ ແລະ ຄາດໝາຍໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 7 ທີ່ກ່ຽວພັນເຖິງການສົ່ງເສີມຄວາມສະເໝີພາບຍິງ-ຊາຍ ລວມທັງເນື້ອໃນຂອງແຜນຍຸດທະສາດແຫ່ງຊາດ ເພື່ອສົ່ງເສີມຄວາມກ້າວໜ້າຂອງແມ່ຍິງແຫ່ງຊາດໃຫ້ລະອຽດໂດຍແນໃສ່ຮັບປະກັນໃຫ້ມີແມ່ຍິງໃນຕໍາແໜ່ງ

2. ສືບຕໍ່ປັບປຸງກົງຈັກເສນາທິການຂອງຄະນະກຳມາທິການເພື່ອຄວາມກ້າວໜ້າຂອງແມ່ຍິງຢູ່ຂັ້ນສູນກາງ ແລະ ທ້ອງຖິ່ນເປັນຕົ້ນ ຄວາມຮູ້ຄວາມສາມາດດ້ານວິຊາການ ແລະ ປະສົບການຕົວຈິງໃນການເຮັດວຽກງານສົ່ງເສີມຄວາມກ້າວ ໜ້າຂອງແມ່ຍິງ, ໂຄສະນາເຜີຍແຜ່ ແລະ ແນະນຳການຈັດຕັ້ງປະຕິບັດແຜນດຳເນີນງານແຫ່ງຊາດກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກໃນ ສປປ ລາວ (2014 - 2020) ໃຫ້ກວ້າງໃນຂອບເຂດທົ່ວປະເທດ,

3. ເພີ່ມທະວີຄວາມຮັບຜິດຊອບຂອງຕົນໃນການປະຕິບັດໜ້າທີ່ເປັນເສນາທິການໃຫ້ແກ່ການນຳແຕ່ລະຂັ້ນ ແລະ ສືບຕໍ່ເອົາໃຈໃສ່ປັບປຸງກົງຈັກຂອງຕົນໃຫ້ມີຄວາມເຂັ້ມແຂງຮອບດ້ານ,

4. ສືບຕໍ່ເອົາໃຈໃສ່ໂຄສະນາເຜີຍແຜ່ ແລະ ປູກຈິດສຳນຶກໃນການຈັດຕັ້ງຂອງພັກ - ລັດທຸກຂັ້ນ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ ແລະ ທຸກພາກສ່ວນໃນສັງຄົມໃຫ້ເຫັນໄດ້ຄວາມສຳຄັນຂອງວຽກງານດັ່ງກ່າວ,

5. ສືບຕໍ່ນຳເອົາວຽກຄວາມກ້າວໜ້າຂອງແມ່ຍິງ, ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຫັນລົງຮາກຖານໂດຍຕິດພັນກັບຂະບວນການ 3 ສ້າງ, ເອົາໃຈໃສ່ເກັບກຳສະພາບຄວາມເປັນຈິງກ່ຽວກັບຂໍ້ຫຍຸ້ງຍາກ ແລະ ສິ່ງກີດ ຂວາງຄວາມກ້າວໜ້າຂອງແມ່ຍິງ,

6. ສືບຕໍ່ປັບປຸງກົນໄກການຕິດຕາມກວດກາ ສະຫຼຸຸບລາຍງານວຽກງານຄວາມກ້າວໜ້າຂອງແມ່ຍິງ ໃນນັ້ນໃຫ້ເອົາໃຈໃສ່ຫັນເປັນແຜນການ, ແຜນງົບປະມານທີ່ເຊື່ອມຈອດກັບລະບົບແຜນການ ແລະ ງົບປະມານຂອງຂະແໜງການ ແລະ ທ້ອງຖິ່ນ ແຕ່ລະຂັ້ນໂດຍຫັນເປັນແຜນວຽກ, ແຜນຄົນ, ແຜນເງິນຢ່າງເປັນລະ ບົບ,

7. ສືບຕໍ່ຮ່ວມມືກັບຕ່າງປະເທດ, ອົງການຈັດຕັ້ງ ສາກົນ ແລະ ອົງການຈັດຕັ້ງຕ່າງໆ ໃນສັງຄົມ ລວມທັງບັນ ດາປະເທດໃນອາຊຽນທີ່ຕິດພັນກັບວຽກງານຄວາມກ້າວໜ້າຂອງແມ່ຍິງ,

8. ເອົາໃຈໃສ່ປັບປຸງແຜນວິທີນຳພາຂອງຄະນະກຳມາທິການສົ່ງເສີມຄວາມກ້າວໜ້າຂອງແມ່ຍິງທຸກຂັ້ນ, ປະຕິບັດຫຼັກການນຳພາເປັນໝູ່ຄະນະ, ຮັກສາລະບອບສ່ອງແສງລາຍງານຂໍຄຳເຫັນຈາກຂັ້ນເທິງເປັນປົກກະຕິ ແລະ ທັນເວລາ.