ຮອງຫົວໜ້າ ກອງເລຂາ ຄກມຊ ເຜີຍແຜ່ເອກະສານກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ໃຫ້ ຄກມ ກະຊວງການເງິນ

ໃນຕອນເຊົ້າຂອງ ວັນທີ 12 ກຸມພາ 2016 ຜ່ານມາ ຄກມ ກະຊວງການເງິນ ໄດ້ຈັດກອງປະຊຸມເຜີຍແຜ່ເອກະສານກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ເພື່ອລະນຶກວັນສາກົນຢຸດຕິຄວາມຮຸນແຮງຕໍ່ແມ່ຍິງ 25 ພະຈິກ ໂດຍການເປັນປະທານ ຂອງ ທ່ານ ສີລາ ວຽງແກ້ວ ລັດຖະມົນຕີຊ່ວຍວ່າການກະຊວງ ການເງິນ, ປະທານ ຄກມ ກະຊວງການເງິນ, ຜູ້ເຂົ້າຮ່ວມກອງປະຊຸມມີບັນດາ ຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ ພ້ອມດ້ວຍ ພະນັກງານວິຊາການ ລວມຜູ້ເຂົ້າຮ່ວມທັງໝົດ 100 ທ່ານ, ຍິງ 85 ທ່ານ, ຊາຍ 15 ທ່ານ.

ໃນກອງປະຊຸມໄດ້ຮັບຟັງການເຜີຍແຜ່ເອກະສານ ປະຫວັດຄວາມເປັນມາ 25 ພະຈິກ ວັນສາກົນຢຸດຕິຄວາມຮຸນແຮງຕໍ່ແມ່ຍິງ ແລະ ແຜນດໍາເນີນງານແຫ່ງຊາດ ກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍາແມ່ຍິງ ແລະ ຄວາມຮຸນແຮງຕໍ່ເດັກ ໃນ ສປປ ລາວ (2014-2020) ຊຶ່ງນໍາສະເໜີໂດຍ ທ່ານ ນາງ ມະນີວອນ ຫຼວງສົມບັດ ຮອງຫົວໜ້າກອງເລຂາ ຄກມຊ ຈຸດປະສົງເພື່ອສ້າງຄວາມຮັບຮູ້ ແລະ ເຂົ້າໃຈເພິ່ມຕຶ່ມໃຫ້ແກ່ ພະນັກງານພາຍໃນ ກະຊວງ ການເງິນ ໃນຕອນທ້າຍຂອງກອງປະຊຸມ ທ່ານປະທານໄດ້ຮຽກຮ້ອງໃຫ້ພະນັກງານທີ່ເຂົ້າຮ່ວມຈົ່ງໄດ້ເຊື່ອມຊຶມ ແລະ ຜັນຂະຫຍາຍເອກະສານດັ່ງກ່າວເຂົ້າແຜນວຽກລະອຽດໃນກົມກອງຂອງຕົນ ພ້ອມແຜນງົບປະມານ ເພື່ອຈັດຕັ້ງປະຕິບັດໃຫ້ເກີດຜົນ.