ສະເຫຼີມສະຫຼອງວັນເດັກສາກົນ 2017

ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ( ຄຊກມດ ) ຮ່ວມກັບນະຄອນຫຼວງວຽງຈັນ ໄດ້ຈັດງານສະເຫຼີມສະຫຼອງວັນເດັກສາກົນ (1 ມິຖຸນາ) ຂຶ້ນ ໃນຕອນເຊົ້າຂອງວັນທີ 31 ພຶດສະພາ 2017 ທີ່ສູນການຄ້າ ລາວ-ໄອເຕັກ ພາຍໃຕ້ການເປັນປະທານຂອງ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ປະທານ ຄກມດ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ເຊິ່ງບັນດາລັດຖະມົນຕີ-ຮອງລັດຖະມົນຕີ, ຫົວໜ້າຜູ້ຕາງໜ້າອົງການ UNICEF ປະຈຳລາວ, ກົມກອງອ້ອມຂ້າງ, ອຳນາດການປົກຄອງທ້ອງຖິ່ນ, ຜູ້ປົກຄອງ, ຄູອາຈານ ແລະ ນ້ອງນ້ອຍນັກຮຽນ ເຂົ້າຮ່ວມຢ່າງມີບັນຍາກາດຟົດຟື້ນ.

ໃນການຈັດງານຄັ້ງນີ້, ຈັດຂຶ້ນໂດຍຕິດພັນກັບວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ, ວັນສາກົນລຶບລ້າງການໃຊ້ແຮງງານເດັກ 12 ມິຖຸນາ 2017 ແລະ ສັບປະດາສັກຢາ ກັນພະຍາດສາກົນ ປີ 2017. ໃນພິທີ ທ່ານ ສີຫຸນ ສິດທິລືໄຊ ຍັງໄດ້ຍົກໃຫ້ເຫັນ ຄວາມເອົາໃຈໃສ່ຂອງ ພັກ ແລະ ລັດຖະບານຂອງ ສປປ ລາວ ຕໍ່ກັບວຽກງານພັດທະນາເດັກ ທີ່ເປັນອະນາຄົດຂອງຊາດ, ການມີສ່ວນຮ່ວມຂອງໝົດທຸກຄົນ ແລະ ທຸກພາກສ່ວນ ຕໍ່ກັບການປົກປ້ອງສິດ ແລະ ຜົນປະໂຫຍດຂອງເດັກ ໂດຍສະເພາະ ການປະຕິບັດພັນທະຕໍ່ສາກົນ ໃນສົນທິສັນຍາ ວ່າດ້ວຍການລຶບລ້າງທຸກຮູບການ ທີ່ຈຳແນກຕໍ່ແມ່ຍິງ (ຊີດໍ) ແລະ ສົນທິສັນຍາວ່າດ້ວຍ ສິດທິເດັກ ລວມເຖິງອະນຸສັນຍາ 2 ສະບັບກ່ຽວກັບເດັກ ແລະ ການຈັດຕັ້ງຜັນຂະຫຍາຍ ແຜນຍຸດທະສາດແຫ່ງຊາດ, ແຜນງານແຫ່ງຊາດ 5 ປີ ກ່ຽວກັບວຽກງານ ແມ່ ແລະ ເດັກ (2014-2020). ນອກຈາກນີ້, ຍັງໄດ້ເອົາໃຈໃສ່ປັບປຸງກົນໄກ ແລະ ການຈັດຕັ້ງ ຄກມດ ແຕ່ລະຂັ້ນ ໃຫ້ມີຄວາມໜັກແໜ້ນເຂັ້ມແຂງ, ປະຕິບັດໜ້າທີ່ ແລະ ພາລະບົດບາດຂອງຕົນ ຕິດພັນກັບວຽກງານຈຸດສຸມຂອງລັດຖະບານ, ການຈັດຕັ້ງປະຕິບັດບັນດາໂຄງການ ແລະ ກິດຈະກຳ ເຂົ້າໃນຂະແໜງການຕ່າງໆ ຢ່າງມີປະສິດທິພາບ ແລະ ປະສິດທິຜົນ ເປັນຢ່າງດີ. 

ໃນພິທີສະເຫຼີມສະຫຼອງຄັ້ງນີ້, ທ່ານຮອງນາຍົກລັດຖະມົນຕີ ແລະ ຄະນະນຳ ໃນ ຄຊກມດ ຍັງໄດ້ຮ່ວມກັນມອບຂອງຂວັນ ແລະ ຢອດຢາກັນພະຍາດ ໃຫ້ແກ່ຫຼານນ້ອຍ-ນັກຮຽນ. ພ້ອມດຽວກັນນີ້ ຜູ້ເຂົ້າຮ່ວມ ຍັງໄດ້ຮັບຊົມການສະແດງສີລະປະວັນນະຄະດີ ແລະ ລະຄອນເວທີ ຂອງນ້ອງນ້ອຍນັກຮຽນ ຈາກບັນດາໂຮງຮຽນໃນນະຄອນຫຼວງວຽງຈັນ ແລະ ບັນດາແຂວງ ພາກເໜືອຈຳນວນໜຶ່ງ ລວມເຖິງບັນດາກິດຈະກຳສົ່ງເສີມຄວາມຮູ້ຮອບຕົວ ແລະ ອື່ນໆ.